Олий суд Пленумининг «Судлар томонидан жиноят учун жазо тайинлаш амалиёти тўғрисида»ги 1-сонли қарорига ўзгартириш ва қўшимчалар киритиш ҳақидаги» 22-сонли қарори мазмун-моҳияти юзасидан семинар

Унда вилоят суди раиси ўринбосари Т.Мирзаев ва туман(шаҳар) судлари судьялари, тергов судьялари ҳамда ИИБнинг Пробация гуруҳи ходимлари, терговчилар иштирок этишди.

Семинарда судьялар сўзга чиқиб, Пленум қарорларининг қонунчиликни тўғри талқин этиш ва суд амалиётида вужудга келаётган тушунмовчиликларни бартараф этишдаги роли ҳақида фикр билдиришди.

Жумладан, мазкур Пленум қарори пробациядаги маҳкумлар учун назорат ва чекловларни аниқ белгилаш, мажбурий жамоат ва ахлоқ тузатиш ишларини адолатли ва ҳуқуқий асосда тартибга солиш ҳамда уларнинг ижтимоий фаолиятини муҳофаза қилишни таъминлаши билан аҳамиятли эканлиги таъкидланди.

Шунингдек, қарорда пробациядаги шахсларга интернет ва алоқа воситаларига қўшимча чекловлар қўйилиши, жамоат хавфсизлиги ва тартибига таҳдид солувчи ҳаракатлардан ҳимоя қилиниш тартиби ҳам батафсил тушунтирилган.

Семинар давомида иштирокчилар Пленум қарори ва ундан кўзланган мақсад, ушбу тоифадаги ишларни кўришда алоҳида эътибор қаратилиши лозим бўлган жиҳатлар ҳамда қонунчилик талаби ҳақида батафсил таништирилди.

Вилоят судлари жамоаси «Яшил макон» умуммиллий лойиҳасида фаол иштирок этишди

Бугун юртимизда атроф-муҳитни муҳофаза қилиш, экологик барқарорликни таъминлаш ва яшил ҳудудларни кенгайтиришга қаратилган ишлар янги босқичга кўтарилмоқда. Бу борада Президентимиз ташаббуси билан амалга оширилаётган “Яшил макон” умуммиллий лойиҳаси мамлакатимизда кенг жамоатчиликни бирлаштирган муҳим экологик ҳаракатга айланди десак адашмаймиз.

Ушбу эзгу ташаббус доирасида Хоразм вилоят судлари жамоаси ҳам фаол иштирок этиб келмоқда. Лойиҳанинг баҳорги мавсумида вилоят, туманлараро ҳамда туман (шаҳар) судларида фаолият юритаётган судья ва суд ходимлари иштирокида Хонқа туманида кенг кўламли кўчат экиб, боғ яратиш тадбирлари ташкил этилди.

Жамоавий саъй-ҳаракатлар натижасида ажратилган ер майдонида жами 2 минг туп манзарали ва мевали дарахт кўчатлари экилди. Кўчат экиш ишлари мутахассислар маслаҳати асосида амалга оширилиб, ҳудуднинг тупроқ ва иқлим шароитига мос дарахт навлари танланди. Бу эса экилган кўчатларнинг барқарор ўсиши ва келгусида ҳудуднинг янада кўкаламзор бўлишига хизмат қилади.

Тадбирда судья ва суд ходимлари нафақат кўчат экиш ишларида, балки мавжуд дарахтларни парваришлаш, ҳудудни ободонлаштириш каби ҳашар жараёнларида ҳам фаол қатнашишди. Шу билан бирга, экилган кўчатларнинг тўлиқ парвариши, уларни мунтазам суғориш ва агротехник тадбирларни ўз вақтида амалга ошириш учун масъул ходимлар бириктирилди.

Бу каби ташаббуслар табиатни асраш, экологик маданиятни юксалтириш ҳамда келажак авлод учун соғлом ва мусаффо муҳит яратишга хизмат қилади.

Аҳоли билан очиқ мулоқот

Фуқаролар билан очиқ мулоқот ўтказиш, уларга қонунчиликдаги янгиликлар мазмун-моҳиятини етказиш ҳамда ҳудуддаги жиноятчилик ҳолатини муҳокама қилиш мақсадида жиноят ишлари бўйича Урганч туман судининг тергов судьяси З. Мадраҳимов томонидан туманнинг “Қумравот” маҳалласида очиқ мулоқот ташкил этилди.

Мазкур тадбир давомида судья томонидан маҳаллада содир этилган ҳуқуқбузарликлар таҳлилига алоҳида тўхталиб ўтилди, ҳуқуқбузарликларнинг салбий оқибатлари ҳамда жавобгарликнинг муқаррарлиги аниқ ҳаётий мисоллар орқали тушунтирилди. Шунингдек, иштирокчиларга қонунларга риоя этиш, ҳуқуқий маданиятни ошириш ва жиноятчиликнинг олдини олиш борасида амалий тавсиялар берилди.

Шунингдек, иштирокчилар ЎРҚ-1084-сонли Қонун билан Жиноят кодексига киритилган ўзгартиришлар ҳамда Президентимизнинг “Аёллар ва болалар ҳуқуқларининг ҳимоясини кучайтириш ҳамда уларга нисбатан тазйиқ ва зўравонлик ҳолатларининг олдини олиш бўйича қўшимча ташкилий-ҳуқуқий чоралар тўғрисида”ги Фармони мазмун-моҳияти билан таништирилди. Хусусан, ушбу ҳужжатда аёллар учун белгиланган имтиёзлар, кафолатлар ва уларни ҳимоя қилиш механизмлари атрофлича тушунтириб берилди.

Тадбир давомида сайёр суд мажлиси ҳам ўтказилди. Унда кўриб чиқилган айрим маъмурий ишлар тарафларнинг ярашуви билан тугатилган бўлса, бошқа ҳолатларда ҳуқуқбузарларга нисбатан қонун доирасида тегишли жазо чоралари тайинланди. Мазкур сайёр мажлис аҳоли ўртасида ҳуқуқий онг ва маданиятни юксалтириш, ҳуқуқбузарликларнинг барвақт олдини олишда муҳим аҳамият касб этди.

Тергов фаолиятини такомиллаштиришга бағишланган ўқув-амалий семинар

Давлатимиз раҳбари томонидан ўтган йил 5 март куни Коррупцияга қарши курашиш миллий кенгаши йиғилишида, шунингдек жорий йил 27 январь куни Тошкент шаҳрида хавфсиз муҳитни шакллантириш бўйича намунали амалиёт яратиш юзасидан ўтказилган йиғилишда белгиланган вазифалар ижросини таъминлаш мақсадида Хоразм вилояти Ички ишлар бошқармасида ўқув-амалий семинар ташкил этилди.

Тадбирда Ўзбекистон Республикаси Олий суди ва вилоят суди судьялари, Ички ишлар вазири ўринбосари, Бош прокуратура ҳамда Ҳуқуқни муҳофаза қилиш академияси масъул ходимлари, вилоят прокуратурасининг тармоқ раҳбарлари, туман ва шаҳар прокурорларининг соҳавий ўринбосарлари ҳамда терговчилари, Ички ишлар бошқармаси ва Иқтисодий жиноятларга қарши курашиш департаменти вилоят бошқармасининг терговга масъул раҳбарлари, терговчи ва суриштирувчилари иштирок этди.

Тергов сифатини оширишда муҳим аҳамиятга эга бўлган ушбу ўқув-амалий семинарда тажрибали мутахассислар томонидан жиноят ишларини судда кўриш жараёнида тергов ва суриштирув органлари томонидан йўл қўйилаётган камчиликлар, терговда рақамли криминалистика орқали электрон далилларни тўплаш ва мустаҳкамлашнинг замонавий усуллари, шунингдек ахборот технологияларидан фойдаланган ҳолда содир этилаётган жиноятлар (кибержиноятлар)ни фош этишнинг ўзига хос жиҳатлари ҳақида маърузалар қилинди.

Ўзаро баҳс-мунозара руҳида ўтган тадбир давомида терговчилар томонидан берилган саволларга батафсил жавоб берилди.

Аёллар ва болалар ҳуқуқлари ҳимояси — устувор вазифа

Президентимиз томонидан 2026 йил 3 март куни қабул қилинган “Аёллар ва болалар ҳуқуқларининг ҳимоясини кучайтириш ҳамда уларга нисбатан тазйиқ ва зўравонлик ҳолатларининг олдини олиш бўйича қўшимча ташкилий-ҳуқуқий чоралар тўғрисида”ги Фармон мазмун-моҳиятини аҳолига тушунтириш мақсадида Қўшкўпир туманида очиқ мулоқот ташкил этилди.

Мазкур тадбирда фуқаролик ишлари бўйича Урганч ва Боғот туманлараро судлари раислари Ш.Исмоилов, Ғ. Матякубов, жиноят ишлари бўйича Қўшкўпир туман суди раиси Ф. Исмоиловлар иштирок этиб, фармонда белгиланган вазифалар, айниқса аёллар ва болалар ҳуқуқларини ишончли ҳимоя қилиш, уларга нисбатан тазйиқ ва зўравонлик ҳолатларининг олдини олиш, бундай ҳолатларга нисбатан муросасиз муносабатни шакллантириш каби муҳим масалалар ҳақида атрофлича маълумот беришди.

Очиқ мулоқот давомида иштирокчиларга мамлакатимизда аёллар ва болалар манфаатларини ҳимоя қилиш давлат сиёсати даражасига кўтарилгани таъкидланди. Шунингдек, мазкур фармон билан оилавий зўравонликка қарши курашиш тизими янада такомиллаштирилаётгани, жабрланувчиларни ҳуқуқий ва ижтимоий жиҳатдан қўллаб-қувватлаш чоралари кенгайтирилаётгани ҳақида тўхталинди.

Тадбир давомида судьялар томонидан маҳалла фаолларига фуқаролик ишлари бўйича судларда кўриладиган низолар тоифаси, жумладан оилавий муносабатлар, мулкий низолар, алимент ундириш, мерос масалалари каби йўналишлар бўйича батафсил тушунтиришлар берилди.

Сайёр суд – жиноятдан тўғри хулоса чиқаришга ундайди

Жиноятчиликнинг олдини олиш, аҳоли ўртасида ҳуқуқий онг ва ҳуқуқий маданиятни ошириш ҳамда жиноятга жазо муқаррар эканлигини кенг жамоатчиликка тушунтириш мақсадида жиноят ишлари бўйича Янгибозор туман суди томонидан кенг қамровли сайёр суд мажлиси ташкил этилди.

Унда маҳалла фаоллари, профилактик ҳисобда турувчи фуқаролар, ёшлар ҳамда турли идора ва ташкилотлар вакилларидан иборат 100 нафардан ортиқ иштирокчи қатнашди.

Тадбир аввалида туман суди раиси Ҳ.Саидов ва тергов судьяси Б.Хайитбоевлар томонидан тумандаги криминоген вазият, жиноятчиликнинг олдини олиш борасида амалга оширилаётган чора-тадбирлар, айниқса ёшлар ўртасида учраётган ҳуқуқбузарликлар ҳақида маълумот берилди. Шунингдек, гиёҳвандлик, ўғрилик ва бошқа турдаги жиноятларнинг инсон тақдирига, оиласи ва жамиятга келтирадиган салбий оқибатлари аниқ мисоллар асосида тушунтирилди.

Шундан сўнг сайёр суд мажлисида бир қатор жиноят ва маъмурий ишлар кўриб чиқилди. Суд жараёнида ишга оид барча ҳолатлар атрофлича ўрганилиб, судланувчиларнинг кўрсатмалари тингланди. Суд томонидан айбдор деб топилган шахсларга қонунчиликда белгиланган тартибда тегишли жазолар тайинланди.

Суд жараёнини бевосита кузатган иштирокчилар судланувчиларнинг қилган ишидан пушаймонлиги, суд ҳукмининг эълон қилиниши ва жазони ижро этишга юборилиш жараёнларига гувоҳ бўлишди. Бу эса уларда жиноят содир этиш қандай оқибатларга олиб келиши ҳақида аниқ тасаввур уйғотди.

Тадбир якунида фуқароларга қонунларга риоя қилиш, жиноят ва ҳуқуқбузарликлардан йироқ бўлиш, ёшларни турли салбий иллатлардан асраш ҳамда жамиятда қонун устуворлигини таъминлаш ҳар бир инсоннинг бурчи экани таъкидланди.

Сайёр суд мажлислари аҳоли ўртасида ҳуқуқий тарғиботни кучайтириш, фуқароларни жиноят содир этишдан қайтариш ва жамиятда қонунийликни таъминлашда муҳим аҳамият касб этмоқда.

Банкротлик ишларини кўриб чиқиш амалиётига бағишланган семинар ўтказилди

Хоразм вилоят судининг иқтисодий ишлар бўйича судлов ҳайъати ташаббуси билан банкрот деб топилган корхоналарни тугатиш жараёнида учраётган муаммоларни аниқлаш ҳамда уларни бартараф этиш масалаларига бағишланган семинар ташкил этилди.

“Тўловга қобилиятсизлик тўғрисидаги ишларни кўриш амалиёти ва мавжуд муаммолар” мавзусидаги мазкур тадбирда вилоят ва туманлараро иқтисодий суди судьялари, вилоят прокуратураси, солиқ ва божхона бошқармалари, Ўзбекистон суд бошқарувчилари ассоциацияси вилоят бўлими, Давлат активларини бошқариш агентлиги ҳамда тижорат банклари вакиллари иштирок этди.

Семинар давомида суд томонидан банкрот деб топилган корхоналарни тугатиш жараёнида суд бошқарувчиларининг фаолияти, шунингдек тугатиш жараёнларининг асоссиз чўзилишига сабаб бўлаётган омиллар муҳокама қилинди. Мавжуд муаммолар танқидий-таҳлилий асосда кўриб чиқилиб, уларни бартараф этиш бўйича тегишли вазифалар белгилаб олинди.

Шунингдек, иштирокчиларга банкротлик ишларини кўриб чиқиш амалиётининг ўзига хос жиҳатлари, қонунчилик талабларига қатъий риоя этиш ҳамда бу борада амалий ҳамкорликни кучайтириш зарурлиги юзасидан тушунтиришлар берилди.

Маҳаллада очиқ мулоқот ўтказилди

Аҳолини қонунчиликдаги янгиликлар билан таништириш ва маҳаллаларда жиноятчиликнинг олдини олиш мақсадида вилоят суди судьялари Ш.Раззақов, О.Маҳмудов ва М.Рузметов, жиноят ишлари бўйича Урганч шаҳар суди судьяси Б.Якубовлар томонидан “Авесто” маҳалласида очиқ мулоқот ўтказилди.

Мулоқот давомида иштирокчиларга қонунчиликдаги сўнгги янгиликлар, «Ўзбекистон – 2030» стратегияси доирасида суд тизимида амалга оширилаётган рақамлаштириш жараёнлари ҳақида батафсил маълумот берилди.

Шунингдек, судьялар томонидан жамиятда долзарб бўлиб турган масалалар — оилавий зўравонликнинг салбий оқибатлари, болалар ҳуқуқларини ҳимоя қилиш, коррупция ва гиёҳвандлик каби жиноятларнинг олдини олишга алоҳида эътибор қаратилди.

Якунда иштирокчилар билан ҳудудда содир этилган жиноятлар муҳокама қилиниб, келгусида бу каби ҳолатларнинг олдини олиш, жиноятчиликка қарши курашишда аҳоли ва мутасадди идоралар ҳамкорлигини янада кучайтириш зарурлиги таъкидланди.

Криминоген ҳудудларда ҳуқуқбузарликларнинг олдини олиш масалалари муҳокама қилинди

Урганч туманида ҳуқуқбузарликлар профилактикаси самарадорлигини ошириш, криминоген вазиятни барқарорлаштириш ҳамда қонун устуворлигини таъминлаш масалаларига бағишланган кенг қамровли йиғилиш бўлиб ўтди.

Унда вилоят суди раиси ўринбосари Т. Мирзаев, жиноят ишлари бўйича Урганч туман суди раиси И. Усмонов, туман ҳокими Г. Султанов, прокуратура ва ИИБ раҳбарияти ҳамда тумандаги ташкилотлар вакиллари, маҳалла фуқаролар йиғини раислари иштирок этди.

Йиғилиш давомида ҳуқуқни муҳофаза қилувчи органлар билан ҳамкорликда криминоген ҳудудларда олиб борилаётган ишлар самарадорлиги, жиноятчиликнинг олдини олиш, фуқаролар ўртасида ҳуқуқбузарликлар профилактикасини кучайтириш масалалари атрофлича муҳокама қилинди. Айниқс, бугун жамиятда долзарб ҳисобланган гиёҳвандлик, ёшларнинг бу иллат домига тушиб қолиши ва жазонинг муқаррарлигига алоҳида тўхталинди.

Шунингдек, суд қарорлари ижросини ўз вақтида ва тўлиқ таъминлаш, фуқаролар томонидан ер участкаларини ўзбошимчалик билан эгаллаб олиш ҳамда ноқонуний қурилишларнинг олдини олиш бўйича амалга оширилаётган ишлар таҳлил қилинди.

Йиғилишда сўзга чиққан вилоят суди раиси ўринбосари – жиноят ишлари бўйича судлов ҳайъати раиси Т. Мирзаев давлат заҳирасидаги ерларни ўзбошимчалик билан эгаллаш ва ноқонуний қурилишлар қилиш ҳолатлари қонунбузилиш ҳисобланишини таъкидлади. Унинг қайд этишича, бундай ҳолатлар нафақат қонун талабларига зид, балки ҳудудларнинг режали ривожланишига, инфратузилма тизимига ҳамда аҳоли манфаатларига салбий таъсир кўрсатади. Шу боис фуқаролар ўртасида тушунтириш ишларини кучайтириш, ердан қонун доирасида ва оқилона фойдаланиш маданиятини шакллантириш муҳим экани алоҳида таъкидланди.

Йиғилиш якунида жиноятчиликнинг олдини олиш, аҳоли ўртасида ҳуқуқий маданиятни юксалтириш ҳамда маҳаллалар ва тегишли идоралар ўртасидаги ҳамкорликни янада мустаҳкамлаш бўйича аниқ вазифалар белгилаб олинди.

Суд қарорлари ижроси — адолатни таъминлашнинг муҳим босқичи

Хоразм вилоятида суд қарорлари ижросини ўз вақтида ва тўлиқ таъминлаш, мазкур йўналишдаги ишлар самарадорлигини янада ошириш масалаларига бағишланган амалий семинар бўлиб ўтди. Унда Хоразм вилоят суди, вилоят маъмурий суди ҳамда Мажбурий ижро бюроси вилоят бошқармаси вакиллари иштирок этишди.

Тадбирда суд раислари, судьялар ва МИБ ходимлари бмлан суд ҳужжатларининг ижросини таъминлашдаги ҳамкорликни янада мустаҳкамлаш, ижро жараёнида юзага келаётган муаммоларни бартараф этиш ҳамда иш самарадорлигини ошириш масалалари атрофлича муҳокама қилинди.

Семинар давомида жорий йилнинг ўтган даврида Мажбурий ижро бюросига юборилган ижро ҳужжатлари, уларнинг ижроси ҳолати, шунингдек айрим ижро ҳужжатларининг қайтарилишига сабаб бўлаётган омиллар таҳлил қилинди. Мутахассислар томонидан мазкур ҳолатларнинг сабаблари ўрганилиб, уларни бартараф этиш бўйича таклиф ва тавсиялар билдирилди.

Шунингдек, мулоқотлар жараёнида ижро ҳужжатларини расмийлаштириш, электрон ахборот тизимлари орқали юборишда учраётган айрим тушунмовчиликларга ойдинлик киритилиб, амалиётда ягона ёндашувни таъминлаш масалаларига алоҳида эътибор қаратилди.

Тадбир иштирокчилари томонидан суд қарорларининг ўз вақтида ва самарали ижро этилиши фуқароларнинг ҳуқуқ ва манфаатларини ҳимоя қилиш, қонун устуворлигини таъминлаш ҳамда адолатни қарор топтиришда муҳим аҳамият касб этиши алоҳида таъкидланди.

Семинар якунида судлар ва Мажбурий ижро бюроси ўртасидаги ҳамкорликни янада мустаҳкамлаш, ижро жараёнида учраётган камчиликларни қонун доирасида бартараф этиш ҳамда суд қарорлари ижроси самарадорлигини оширишга қаратилган аниқ вазифалар белгилаб олинди.

Skip to content